مدون كسول

بسم الله الرحمن الرحيم
السلام عليكم
الفترة الأخيرة أنا كنت كسول او بالأحرى لم أدخل الإنترنت منذ أيام فقد كنت مشغولا بالامتحانات التي كانت(زي الزفت)ولهذا السبب لم أكن أرد على مدوناتكم وسوف اتغيب خلال المدة القادمة لفترة شهر من اجل الإمتحانات النهائية فارجو إعذاري
وماتنسونييييييييييييييييييييش راجع باذن الله بس انتم ادعولي

كل عام وانتم بألف خير

كل عام وانتم بالف خير وصحه اللي كلي شوى وقديد وعصبان واللي يبي يعزمني على حاجه بطني مازال فيها مكان هههههههههههههه

بدون مانطول عليكم عيد السنه هدي درت فيه كل شي ماعدا جر الموس عالضحيه سلخت وفتحت السقيطه وقطعت وحتى القديد قددت يللا بلاش ضحك

يوم الموسم روحت للحوش الساعه اربعه ونص صار حادث قدام الحلاق والحمد لله ماتفي حد وصل في السياره لكن كبرت الدوه دعم على شرطه على تحقيقات وانا السياره أوراقها طايحات لكن طلعت منها

يوم العيد نضت الساعه9 وكان المفروض مانرقدش ككل عيد لما نروح متاخر لكن فاتت عليا نومه ونضت وبدينا نقلوا في الخرفان و العده لأنه منضحوا في حوش جدي

وكان عدد الضحايا سته والباقي كله عادي سوا أني السنه هادي قريب قصيت ايدي منرشق الموس في الشجره فانزلقت ايدي عالموس فارتشق في ايدي

وعندي هالصور في البدايه ترددت مانبيش انزلهم خفت تغلطوا فيا وتحسابوني ضحيه هههههههههه لكن الكاميرا جت بعد الذبح لذلك مافيش صور للضحايا فنزلتهم وردوا بالكم تغلطوا

تحدي 2007

اليوم كان يوم اثنين والجو مطر وكان العبد الفقير خوكم ماشي من امام مركز الشرطه لكن في المخالف
خاش الطريق بالممنوع وقدام المركز ليش ؟
مش عارف تمبله مانبيش نمشي نلف والا مش داير أهمية للقانون ولا للشرطه
وطبعا لما كنت ماشي من قدام المركز واحد منهم وين ماشي يا ظالم يا... وسكت قلتله كمل خيرك سكتت ماردش عليا وكانت على طلعة سيارة الشرطه وقفوا ونزلوا قال كبيرهم والكبير الله : وين أوراقك ياغالي
قلتله (كالعاده نسخف) في الحوش ياوجه القمبالي
قال: الرخصه وين؟
قلتله اهي معاي
ركب عاليمين وقاللي هي تفضل خش للمركز انت وسيارتك
والمركز مش مركز مرور هو مركز شرطه قسم
خشيت للمركز في الأول نحساب روحي في برنامج الرابح الأكبر من اول شرطي لأخر شرطي كل واحد بطنه قدامه ميترو ولقيتهم يلحسوا في المكرونه كلهم
المهم بعد ماحجزوا الرخصه والسياره طلعت ومشيت
خبرت قريبي بيش يطلعها لكن ماطلعت الا بعد ماباتت نهار عندهم وباتت بره يعني بوي سمع
عطاني محاضرة بعنوان
حاميها حراميها او لا يخالف القانون الا من يعرفه
او حط اي عنوان يعجبك
وفي اخر المطاف طلعت مجرم
فهل أنا مجرم حقا ؟

شعر شعبي

انا من عشاق الشعر بصفة عامة الشعبي والفصحى لذلك راح أنزلكم أحيانا بعض الاشعار منها ما جادت بهي خاطرتي المتواضعه ومنها ماسمعت وحفظت
سمح اللون غزال صغير
فراقك نار
لهيبه ياام عيون كبار
دموعي هافن زي الأمطار
بعيده ماعرفنالك دار
سكن حبك في القلب وصار
مرسي كيف جبال كبار
محيرني مابي يتحير
خده بارق ضيه يشير
سمح اللون غزال صغير

استفتاء

هذا استفتاء ونبي أي واحد يقراه يعطينا رأيه
في البداية نحكي قصة الإستفتاء
أقرب اصدقائي ثلاثة م , م , ي
طبعا اقرب أصدقائي واحد منهم متزوج يللي هو م الاول
والثانييين خاطبين (عاطيين كلمه) بس الإستفتاء على طريقة الزواج
م الأول تزوج على الطريقة التقليديه يعني ماشافش العروس ولا يعرفها يادوبك يعرف اسمها
وم الثاني خاطب بعد قصة حب رومانسيه ويعرفها من ايام 3اعدادي وقصة حب قووووووووووووووويه زي الأفلام
والثالث اللي هو ي شاف بنت في الكلية عجباته كلمها وقاللها منخطبك طبعا ماردتش عليه وبعدها خطبها
الإستفتاء طبعا انت يامدون ـه
مع اي طريقه وليش ؟
والطريقه اللي تزوجت بيها او انخطبت او تتمنى تكون عليها
أما عن رأيي بعد ردودكم
ملاحظه الموضوع هذا كتبته من فتره بس ماكنتش عارف ننقل الموضوع من البيت للنت
سلام

وأخيرا

في البداية السلام عليكم ورحمة الله
أخيرا حصلت خط قوي يمكني إني نكتب في المدونه
في البداية كنت غايب بسبب حالة وفاة ومن ثم دخلت النت لكن الخط ضعيف يعني قريت مواضيع وماتمكنتش نرد ولا انزل موضوع
ونحب نشكر كل من قدم العزاء لي في جدي رحمه الله
وان شاء الله راح اكون معاك اول بأول
وربي مايفرقنا

رمضان هذا العام

بسم الله الرحمن الرحيم
السلام عليكم ورحمة الله تعالى وبركاته
في البداية نقوللكم كل عام وانتم بخير مع انها متأخره
ونقوللكم اشتاقتلكم واجــــــــــــــــــــــــــد ونعتذر على الغياب (مكره أخاك لا بطل )كيف مايقولوا
التأخير كان بسبب انشغالي في رمضان وبعد رمضان في الانتقال للمنزل الجديد انتقلنا يوم الموسم يعني هذا العام مش الملابس جديده بس حتى الحوش مع اني جربت نخش للنت لكن الخط كان ضعييييييييييييييييييييييييييييييف
وتو منخبركم بالتفصيل الملل كيف جرت اموري في رمضان السنه هادي
طبعا في هليا حاجات تغيرت على رمضان في السنين اللي فاتوا
اول حاجه ماصليتش التراويح في رمضان السنه هادي لاإمام ولا مأموم وكنت قبل لو ماصليتش امام نكون مأموم ولكن لايكلف الله نفسا الا وسعها
كنا نرجع من الحوش الجديد قبل الفطور واحيانا يأذن المغرب واحني مانروحوش
وبعد المغرب على طول بوي يقول يللا إلى الموقع يعني نحمد في ربي اللي نصلي في الفرائض
ثاني حاجه تغير علي الجو ولحد اليوم ماتأقلمتش مع داري الجديده وصدقوني لليوم مارقدتش وانا مرتاح مازلت متعود على سريري في الحوش القديم وتوه نرقد والشقه اللي نرقد فيها ساكته لدرجة الخوف
يعني مافيش كان شوية دوشه لخوتي الاتنين اللي اصغر مني فيصل اصغر مني بسنتين ومصطفى اصغر مني بتماني سنوات هما في دار وحده جميع في الشقه معاي
والمصادفه انه تالت مره ننتقلوا من حوش لحوش في رمضان
اول مره كان عمري تلات سنين تقريبا لما انتقلنا من حوش جدي الى حوشنا الاول
وتاني مره كنت نقرا في صف تاني ابتدائي لما انتقلنا للحوش التاني وتوه جت في رمضان حتى هيا
والمره الاولي انتقلنا من حوش جدي لحوشنا الاول طبعا بدون سبب الا للتوسيع والتانيه لنفس السبب لكن التالته بعناه الحوش يعني الاول مازال موجود لكن التاني بعناه مع انه كبير وباهي لكن بوي يحب الحوايز والوسع ويبي يكبر البني
وتغير الروتين يعني زمان كنت في أغلب الأحيان نمشي على رجلي للكليه لكن توه لازم من سياره وطبعا لازم انوض الساعه سبعه نوصل خوي واختي الصغيره للمدرسه ونرجع للحوش نبدل ونفطر ونمشي للكليه وبعدها الظهر لو ماعنديش محاضره وقتها نروح بيهم من المدرسه ونرفع آيه للمدرسه صف تالت يعني العشيه
وبعدها نروح بيها الساعه خمسه
مابعدهم الاباء اللي طول النهار ماشي جاي
ومانبيش نزيد ننفخلكم راسي تو نكملكم باقي القصه